Ikigo REMA cyatangiye gutanga Imbabura zirondereza ibicanwa no kugabanya imyuka ihumanye yoherezwa mu kirere
Ikigo cy’igihugu cyo kubungabunga ibidukikije (REMA) kibinyujije mu mushinga wacyo wo gusubiranya igice cy’Amayaga “Forest Landscape Restoration in the Amayaga Region (Green Amayaga) Project, kiri gutanga Imbabura ku bagenerwabikorwa b’uwo mushinga mu turere ukoreramo.
Izo mbabura zirondereza ibicanwa zikanagabanya imyuka ihumanye yoherezwa mu kirere ziri gutangwa mu rwego rwo gushyira mu bikorwa intego z’umushinga Green Amayaga wo gusubiranya igice cy’Amayaga.
Kuva ku wakabiri tariki 23 Gashyantare kugeza ku wagatanu tariki 26 Gashyantare 2021, Imbabura ibihumbi bine zahawe abagenerwabikorwa b’umushinga mu murenge wa Mugina w’akarere ka Kamonyi, mu rwego rwo kubafasha kurengera ubuzima bwabo, kugabanya itemwa ry’amashyamba no kurengera ikirere hagabanywa ingano y’imyuka ihumanye icyoherezwamo.
Mu karere ka Kamonyi hazatangwa Imbabura 11,000 harimo ibihumbi bine byatanzwe mu murenge wa Mugina, izindi 4,000 zizatangwa mu murenge wa Nyamiyaga, 1,500 zizatangwa mu murenge wa Nyarubaka n’izindi 1,500 zizatangwa mu murenge wa Rugarika.
Mu tundi turere (Gisagara, Nyanza na Ruhango) umushinga Green Amayaga wo gusubiranya igice cy’Amayaga ukoreremo, gutanga izo mbabura bizatangira mu mwaka utaha w’inyengo y’imari wa 2021/2022.
Mu turere twose uko ari tune umushinga ukoreramo hazatangwa Imbabura 60,000 mu gihe cy’imyaka itandatu umushinga uzamara.
Biteganyijwe ko izo mbabura mu gihe cy’imyaka itandatu zizagira uruhare mu kugabanya toni hafi miriyoni eshanu z’imyuka ihumanye yoherezwa mu kirere, ikigo REMA kikagaragaza ko mu myaka 20, izo mbabura zizaba zigabanyije toni zisaga miriyoni 15 z’imyuka ihumanye yoherezwa mu kirere.
Imbabura zihabwa abagenerwabikorwa b’umushinga Green Amayaga zikora neza kuko igipimo cyazo (thermal efficiency) kiri hejuru ya 30, ibi bigatuma zirondereza ibicanwa ku gipimo kiri hejuru ya 50% ugereranyije n’ibicanwa bikoreshwa mu mashyiga gakondo.
Umuhuzabikorwa w’uwo mushinga Philbert Nkurunziza avuga ko ibyo bizafasha kugera ku ntego z’umushinga zo gusubiranya igice cy’amayaga kikongera kugira amashyamba menshi, kuko izo mbabura zizatuma ibiti bidatemwa ku bwinshi hagamijwe gushaka ibicanwa nk’uko byari bisanzwe.
Izo mbabura kandi zizafasha mu guteza imbere ubukungu n’imibereho myiza y’abaturage, kuko bitewe n’uburyo irondereza ibicanwa, abazihawe bazabyaza umusaruro igihe kinini bamaraga bashaka ibicanwa, gikoreshwe mu yindi mirimo ibabyarira inyungu.
Umushinga Green Amayaga wo gusubiranya igice cy’Amayaga ni umushinga w’imyaka itandatu uzakora ibikorwa bitandukanye birimo kurwanya isuri hacukurwa imiringoti, gutera no kuvugurura amashyamba, gutera ibiti bivangwa n’imyaka no gutera ibiti by’imbuto hagamijwe kugabanya indwara ziterwa n’imirire mibi.
Abagenerwabikorwa b’uyu mushinga bashima ibikorwa watangiye gukorera mu gice cy’Amayaga, bakavuga ko bizabateza imbere abatuye muri icyo gice muri rusange n’abagore by’umwihariko.
Nyiramana Jeannette utuye mu kagari ka Nteko ko mu murenge wa Mugina agira ati “Abagore dukunze kubazwa ibyerekeranye n’imirimo myinshi yo mu rugo harimo n’ibyo guteka. Izi mbabura zizatuma tubona umwanya wo gukora ibiduteza imbere kuko batubwiye ko zikoresha udukwi duke cyane, ndetse ukaba wayicanisha n’ibindi bintu byoroheje birimo n’ibitiritiri by’ibigori”
Umushinga Green Amayaga ushyirwa mu bikorwa n’ikigo cy’Igihugu cyo kubungabunga ibidukikije (REMA) ku bufatanye n’uturere twa Kamonyi, Nyanza, Ruhango na Gisagara, ugaterwa inkunga n’ikigega mpuzamahanga gitera inkunga imishinga yo kubungabunga ibidukikije (GEF) binyuze mu ishami ry’umuryango w’abibumbye rishinzwe iterambere (UNDP).
Topics
More posts
Kigali, February 02,2023- Rwanda joins the rest of the world to commemorate World Wetlands Day (WWD) usually celebrated every year with the ultimate…
The Managing Director of the International Monetary Fund (IMF), Kristalina Georgieva commends Rwanda’s commitment to fighting climate change and being…
Kigali, January 11, 2022 – In view of implementing the African Union Commission (AUC) resolution to support African Union (AU) member states to comply…
Montreal, Canada, 22 December 2022 - The “Kunming-Montreal Global Biodiversity Framework” (GBF) adopted at the 15th meeting of the Conference of…
The Rwanda Environment Management Authority (REMA) and the United Nations Development Programme (UNDP) have today launched a five-year project to…
Rwanda is calling on nations of the world to join hands and agree on an ambitious Global Biodiversity Framework at this UN Biodiversity Conference…
Rwanda and Norway through the Rwanda Environment Management Authority (REMA) are organising a "Road map to end plastic pollution by 2040" side event…
Rwanda will join nations from around the world in Uruguay to begin drafting a global treaty to end plastic pollution with the first session of the…
The African Institute for Mathematical Sciences (AIMS), in partnership with Rwanda Environment Management Authority (REMA), have today launched the…